Postuar më: 24/01/2022

Komisioni i Përbashkët Ekonomik Shqipëri-Ukrainë zhvillon takimin e tij të parë

Shqipëria dhe Ukraina kanë potencial të zhvillojnë më tej marrëdhëniet ekonomike dhe tregtare mes tyre.

Një gjë e tillë u konstatua në takimin e parë të Komisionit të Përbashkët Ndërqeveritar për Bashkëpunimin Ekonomik dhe Tregtar Shqipëri-Ukrainë.

Gjatë këtij takimi, Ministrja e Financave dhe Ekonomisë, Delina Ibrahimaj, bëri një prezantim të situatës ekonomike në vend dhe të arritjeve kryesore të qeverisë për zbatimin e reformave të nevojshme për përshpejtimin e procesit të integrimit të Shqipërisë.

Ministrja Ibrahimaj theksoi rëndësinë që ka forcimi i bashkëpunimit të mëtejshëm mes Shqipërisë dhe Ukrainës, sidomos në aspektin ekonomik.

Sa i përket fushave kryesore ekonomike që mund të jenë me interes për investitorët ukrainas, Ministrja përmendi bujqësinë, turizmin, energjinë, transportin dhe sektorin financiar.

Pala shqiptare dhe pala ukrainase, e cila kryesohej nga z. Roman Leshchenko, Ministër i Politikës Agrare dhe Ushqimit të Ukrainës, ranë dakord për rigjallërimin e marrëdhënieve dypalëshe, pavarësisht sfidës së përbashkët, siç është pandemia Covid-19.

Takimi i radhës në funksion të realizimit të objektivave të përbashkët do të zhvillohet në Kiev, në muajin prill të këtij viti.