Denaj: Strategjia e BIDS, instrumente mbështetës për sipërmarrjen

• Ministrja prezanton Strategjinë e Biznesit dhe Investimeve në KI

Këshilli i Investimeve u mblodh sot nën drejtimin e Ministrisë së Financave dhe Ekonomisë, Anila Denaj. Në këtë mbledhje u prezantua, në kuadër të konsultimit publik, Strategjia e re e Nxitjes së Investimeve dhe Biznesit 2021-2027 (BIDS).

Në fjalën e saj, Ministrja Denaj u shpreh se dy objektivat kryesore të Strategjisë janë: Rimëkëmbja nga pandemia COVID 19 dhe Integrimi dhe bashkëpunimi rajonal.

Duke folur për rëndësinë e procesit të integrimit, i cili ka filluar në vendet e Ballkanit Perëndimor nëpërmjet shumë formateve, Ministrja prezantoi vizionin e Strategjisë, i cili është “Një ekonomi shqiptare konkurruese, e nxitur nga inovacioni dhe e bazuar në njohuri, e cila krijon vende të reja pune, por njëkohësisht vende pune cilësore, duke shfrytëzuar mundësitë që ofron tranzicioni digjital dhe transformimi i zinxhirit të vlerave ndërkombëtare, me theksin mbi zhvillimin e qëndrueshëm, integrimin Evropian dhe atë rajonal”.

Po ashtu, Ministrja lançoi tre objektivat specifikë për arritjen e këtij qëllimi janë:

1. Tërheqja e investimeve dhe ndërkombëtarizimi.

Shpalosja e plotë e potencialit investues për zhvillim ekonomik dhe nxitja e integrimit në tregjet dhe zinxhirin e vlerave ndërkombëtare.

2. Zhvillimi i Ndërmarrjeve të vogla dhe të mesme, si një sipërmarrje e cila në bazë ka inovacionin, por njëkohësisht rrit dhe potencialin aktual dhe mësimet gjatë viteve shkuara.
3. “Zhvillimi i kapitalit njerëzor”. Eksplorimi i mënyrave të reja për të nxitur zhvillimin e kapitalit njerëzor bashkëpunues, për të rritur vlerën brenda kompanive por edhe vlerën në të gjithë tregun ndërkombëtar dhe rajonal.

Duke iu referuar dhe Vizionit që Kryeministri Rama ka paraqitur gjatë muajve të fundit, Shqipëria 2030, Ministrja Denaj, vlerësoi se mbështetja kryesore  do të shkojë për ato sektorë që japin një kontribut më të madh në rritjen ekonomike, rritjen e punësimit dhe vetë zhvillimit të vendit. Ndër sektorët që nënvizoi Denaj janë, shërbimet, turizmi dhe bujqësia.

Një ndër pikat kryesore ku Ministrja vuri theksin është digjitalizimi i shërbimeve, si një lehtësi më e madhe për sipërmarrjen. “Ne sot po diskutojmë mënyrat se si të mbështesim biznesin drejt një organizimi më efektiv, por edhe të ndikuar nga situata që pandemia na diktoi”, tha Denaj.

Në raport me personelin dhe zhvillimin e kapaciteteve të burimeve njerëzore, në këtë Strategji, tha Ministrja, janë përfshirë disa instrumente të cilat lidhen drejtpërdrejt me mbështetjen që i bëhet kapitalit njerëzor nëpërmjet subvencioneve që buxheti i shtetit do të japë nëpërmjet trajnimeve të subvencionuara në disa sektorë të rëndësishëm dhe kryesisht në ato që rrisin vlerën drejt produkteve të dixhitalizimit dhe në veçanti drejt ICT.

Gjithashtu, duke kërkuar kontributin e sipërmarrjes që aderon në Këshillin e Investimeve, që konsultimi i kësaj Strategjie të jetë i suksesshëm,  Denaj  theksoi  se vlera e fondeve dhe granteve të parashikuara për biznesin e vogël dhe të mesëm gjatë këtij procesi do të pesëfishohet dhe është shumë e rëndësishme që të gjithë instrumentet që janë vendosur në këtë strategji të diskutohen për të parë nëse i përshtaten objektivave.

Strategjia e re e Nxitjes së Investimeve dhe Biznesit 2021-2027 është parashikuar të ketë një kosto rreth 9.6 miliardë lekë ose 78.1 milionë euro, ku rreth 71 % do të mbulohet nga buxheti i shtetit.

Ajo parashikohet të zbatohet përmes disa instrumenteve kryesorë, të cilët janë:

• Rritje e aksesit në financë për bizneset, ku përfshihet:
• Rikonceptim i skemave ekzistuese për grantet SME duke krijuar një Fond të vetëm “Fondi i Zhvillimit të Ndërmarrjeve Mikro, të Vogla dhe të Mesme;
• Aplikim online për grantet e ndërmarrjeve Mikro, të Vogla të Mesme;
• Skema garancie shtetërore për ndërmarrjet Mikro, të Vogla të Mesme;
• 50 milionë euro garanci shtetërore për manifakturën në rastet e ndryshimit të porosive për të përballuar kostot e ndërtimit dhe kalimit në linja prodhimi të reja.

• Skema e mbështetjes për zhvillimin e kapitalit njerëzor bashkëpunues, që konsiston në prezantimin e një skeme të re financiare për zhvillimin e kapitalit njerëzor:
• Asistencë financiare për NVM që punësojnë të sapodiplomuarit për projekte inovacioni;
• Asistencë financiare për doktorantë që janë punësuar në NVM dhe në të njëjtën kohë janë regjistruar në universitet, të cilët punojnë për një projekt të përbashkët kërkimi.
• Programet “Inovacion dhe ekselencë në manifakturë” dhe “Inovacion dhe ekselencë në IT” për trajnime në inovacion, dizajn, marketing, kërkim dhe zhvillim nëpërmjet mbulimit të kostove të trajnimit 100 %. Kostot do të rimbursohen 50% direkt dhe 50% si 2-fish i tatimit të zbritshëm ndaj shoqërive ku është i punësuar përfituesi.

• Tërheqja e investitorëve të huaj, ku synohet:
• rritja e fluksit të investimeve;
• rritja e totalit të eksportit të mallrave dhe shërbimeve;
• rritja e vlerësimit në Indeksin e Politikave për NMV.
• përqasje e re për të promovuar dhe tërhequr investimet e huaja.

• Mbajtja e investitorëve ekzistues.

Ministria e Financave dhe Ekonomisë ka hedhur për konsultim publik Strategjinë e nxitjes se Biznesit dhe Investimeve, prej disa javësh, ndërkohë që ka një kalendar të këtij konsultimi me të gjitha grupet e interesit.