Denaj me akademikët: Kontributi juaj shumë i rëndësishëm në politikat ekonomike

Kontributi i stafeve akademike dhe ekspertëve të ekonomisë është shumë i rëndësishëm në ndërmarrjen e vendimeve për politikat  e zhvillimit ekonomik.

Ministrja e Financave dhe Ekonomisë, Anila Denaj, në kuadër të konsultimit publik të  Strategjisë së re të Nxitjes së Biznesit dhe Investimeve 2021-2027  zhvilloi  takim me  akademikë  dhe pedagogë të universiteteve të ndryshme në vend.

Duke vlerësuar  rolin dhe kontributin e  akademikeve në  politikat ekonomike të vendit, Ministrja Denaj u shpreh,  se ky është një moment shumë i rëndësishëm, pasi  diskutohet një Strategji 6 vjecare, ku në qëndër është zhvillimi dhe mbështetja e biznesit

“Konsultimi publik si MFE, nuk është vetëm një detyrim juridik dhe formal edhe pse përmirësime për procedura të tilla duhet të ndodhin, tha Denaj, duke shtuar,  se mendojmë që strategjia e zhvillimit të bizneseve dhe investimeve për një periudhë të rëndësishme 6 vjecare ka nevojë për inputin tuaj,  i cili përtej nevojës për ta parë nga ana akademike që është absolutisht e vlefshme, do të donim që të kishim dhe inputin tuaj me instrumenta të rishikuar për të ardhmen”.

Sipas Ministres, janë bërë diskutime për modelin e strukturës ekonomike të biznesit në Shqipëri dhe si do të ishte rruga që do të ndiqte Shqipëria për të rritur vlerë dhe për të marrë në përkthim të kësaj në vite më tepër mundësi të zhvillimit ekonomik, të rritjes së krahut të punës në cilësi, jo vetëm në numër,  por dhe rritje ekonomike.

“Objektivi i sjellë në këtë tryezë është i rëndësishëm dhe për këtë do të donim që jo vetëm këto ditë të jemi në konsultim publik,  por edhe më pas, kontributi juaj të shërbejë dhe në aspektin akademik që është i domosdoshëm,  por edhe në praktikë, tha Denaj, duke iu drejtuar akademikëve, pasi vetë ju  jeni praktikantët që studioni modelet më të mira ekonomike që janë provuar në vende të ndryshme të botës”.

Nisur nga zhvillimet ekonomike, biznesi duhet të kalojë në stadin tjetër, u shpreh Ministrja, ku të mos shikojë modelin e biznesit ku informaliteti kishte një kontribut të caktuar në marzhin e përfitueshmërisë dhe jo si përpjekja për të luftuar informalitetin është një përpjekje e qeverisë për të arritur më shumë të ardhura në buxhet të shtetit, por si të mira sociale,  jo domosdoshmërisht vetëm për biznesin. Megjithatë, sipas saj, struktura ekonomike e bizneseve në Shqipëri ka nevojë për një përmirësim të dukshëm.

Duke përmendur lehtësitë fiskale që qeveria i bëri biznesit këtë vit, Ministrja tha, se nxitja nëpërmjet një strategjie paralel me atë të zhvillimit biznes-investim është për ta bërë biznesin e mesëm ajo që shpesh ne themi kolona e ekonomisë, por në fakt kolona është shumë e brishtë po të marrësh vetëm këto shifra.

Objektivi i dokumentit është tejkalimi i situatës së vështirë ekonomike që krijoi në vendin tonë pandemia COVID 19, tha Ministrja Denaj, ndërsa  nuk la pa përmendur  dhe instrumentat që qëveria përdori gjatë krizës së pandemisë, si garancite sovrane apo lehtësitë fiskale, por tashmë synimi është që transformimi i kompanive dhe biznesit të jetë më i targetuar.

Në këtë kuadër, Denaj tha,  se në Strategjinë e re janë  të përcaktuara disa instrumente financiarë në mbështetje të biznesit në sektorë të veçantë, si në manifakturë apo në turizëm.

“Bota e digjitalizimit nuk shihet vetëm sot por edhe në mënyrën sesi politikat qeveritare nxisin e-commerce dhe si ai mund të lehtësohet si në aspekt procedurial, ashtu edhe administrative apo politikë fiskale dhe kjo ka një nevojë të rëndësishme për të adresuar në të ardhmen, tha Ministrja.

Ndërkohë ajo shtoi, se më e rëndësishmja do të ishte kapitali njerëzor për të gjithë bizneset dhe këtu përfshihen dhe bizneset në botën akademike, ku investimi më i mirë është të ruajmë këto kapitale njerëzore. Duke iu referuar  dhe nismës së Kryeministrit Rama “Gati për Shqipërinë”,  një ndër instrumentat e BIDS, tha Denaj, është subvencioni për trajnime nga kompanitë dhe jo vetëm nga shteti, ku krijon një modalitet ku 50% subvencionohet në mënyrë të drejtpërdrejtë dhe 50% formatohet në formën e “tax credit” që është një model për të investuar te kapitali njerëzor.

Strategjia, e cila në 6 vite do të kushtojë 78 milionë euro, do të mbështetet në masën e 71% nga buxheti i shtetit.

Ajo parashikohet të zbatohet përmes disa instrumenteve kryesorë, të cilët janë:

1-      Rritje e aksesit në financë për bizneset, ku përfshihet:

• Rikonceptim i skemave ekzistuese për grantet SME duke krijuar një Fond të vetëm “Fondi i Zhvillimit të Ndërmarrjeve Mikro, të Vogla dhe të Mesme;
• Aplikim online për grantet e ndërmarrjeve Mikro, të Vogla të Mesme;
• Skema garancie shtetërore për ndërmarrjet Mikro, të Vogla të Mesme;
• 50 milionë euro garanci shtetërore për manifakturën në rastet e ndryshimit të porosive për të përballuar kostot e ndërtimit dhe kalimit në linja prodhimi të reja.

2-      Skema e mbështetjes për zhvillimin e kapitalit njerëzor bashkëpunues, që konsiston në prezantimin e një skeme të re financiare për zhvillimin e kapitalit njerëzor:

• Asistencë financiare për NVM që punësojnë të sapodiplomuarit për projekte inovacioni;
• Asistencë financiare për doktorantë që janë punësuar në NVM dhe në të njëjtën kohë janë regjistruar në universitet, të cilët punojnë për një projekt të përbashkët kërkimi.
• Programet “Inovacion dhe ekselencë në manifakturë” dhe “Inovacion dhe ekselencë në IT” për trajnime në inovacion, dizajn, marketing, kërkim dhe zhvillim nëpërmjet mbulimit të kostove të trajnimit 100 %. Kostot do të rimbursohen 50% direkt dhe 50% si 2-fish i tatimit të zbritshëm ndaj shoqërive ku është i punësuar përfituesi.

3-      Tërheqja e investitorëve të huaj, ku synohet:

• rritja e fluksit të investimeve;
• rritja e totalit të eksportit të mallrave dhe shërbimeve;
• rritja e vlerësimit në Indeksin e Politikave për NMV.
• përqasje e re për të promovuar dhe tërhequr investimet e huaja.

4-      Mbajtja e investitorëve ekzistues.

Ministria e Financave dhe Ekonomisë ka hedhur për konsultim publik Strategjinë e nxitjes se Biznesit dhe Investimeve, prej disa javësh, ndërkohë që ka një kalendar të këtij konsultimi me të gjitha grupet e interesit.