Arben Ahmetaj

Ministër i Financave

Arben Ahmetaj

Z. Arben Ahmetaj ka lindur në Gjirokastër në vitin 1969. Ai është i martuar dhe ka dy vajza.

Mban titullin Doktor i Shkencave në fushën e  Sigurisë energjitike, sigurisë ndërkombëtare, diplomuar në vitin 2009 në Universitetin e Bukureshtit në Rumani.

Ka kryer studimet Master në degën Tregti Ndërkombëtare dhe Diplomaci, në Universitetin e Kentucky-t në Shtetet e Bashkuara të Amerikës, diplomuar në Dhjetor 1996. Në vitet 1996- 2000, z. Ahmetaj ka kryer studimet në Universitetin George Washington, Departamenti i Ekonomisë, dega Menaxhimi i Politikave Ekonomike Publike dhe në Edmund Walsh School of Foreign Service, Washington, në degën Financë ndërkombëtare, tregjet financiare ndërkombëtare. Në vitin 1991 Z. Ahmetaj është diplomuar në Universitetin e Tiranës për Gjuhë Angleze, Specializuar në Literaturë Amerikane dhe Angleze.

Z. Ahmetaj është anëtar i Partisë Socialiste të Shqipërisë. Në vitin 2009 u zgjodh deputet në Kuvendin e Shqipërisë, duke përfaqësuar qarkun e Korçës dhe pas zgjedhjeve të vitit 2013, atë të Gjirokastrës. Ka qenë anëtar i Komisionit Parlamentar për Ekonominë dhe Financat. Është anëtar i Kryesisë së Partisë Socialiste.  

Në shtator 2013, Z. Arben Ahmetaj u emërua Ministër i Zhvillimit Ekonomik, Tregtisë dhe Sipërmarrjes dhe nga Janari 2014, Ministër i Zhvillimit Ekonomik, Turizmit, Tregtisë dhe Sipërmarrjes. 

Në vitet 1998-1999 ka mbajtur postin e Drejtorit të Përgjithshëm në Drejtorinë e Tatimeve të Shqipërisë. Në vitin 2003-2004 ka shërbyer si  Zëvendës Ministër në Ministrinë e Energjisë dhe Industrisë ndërsa 2004- 2005, Zëvendës Ministër në Ministrinë e Integrimit Europian.

Në vitet ’97-‘98 ka punuar në Ministrinë e Financave me detyrën e Drejtorit të Kabinetit dhe ka qenë përgjegjës për marrëdheniet Ndërkombëtare, anëtar i grupit që ka marrë pjesë dhe koordinuar negociatat me Fondin Monetar dhe që konkretizoi një marrëveshje post konfliktuale me ESAF.

Ndër eksperiencat e tjera profesionale janë edhe detyra si Këshilltar për çështjet Fiskale në Bankën Amerikane të Shqipërisë; Janar-Qershor ’99; Këshilltar për Çështjet Fiskale në Bankën e Shqipërisë; eksperienca e punës pranë Fondit Monetar Ndërkombëtar gjatë periudhës nëntor ’93- shkurt ’95.

Nga 18 Shkurti 2016, Z. Arben Ahmetaj mban detyrën e Ministrit të Financave të Republikës së Shqipërisë.